Vørn fingið trupulleika við makrelloyvunum

Vørn hevur fingið ein trupulleika frá Fiskimálaráðnum. 

14 loyvi eru at fiska makrel í ES sjógvi í ár, men yvir 30 umsóknir eru komnar. Og allar kunnu ikki fáa játtandi svar.    

Nýggjársaftan segði Johan Simonsen, deildarleiðari á Vørn, við Útvarpið, at ein møguleiki er at brúka lutakast, tá loyvini skulu skrivast. 

Eingin beinleiðis orðað heimild er, hvørki í lóg ella í kunngerð, at brúka lutakast í sambandi við makrelloyvi.

Rógvi Reinert, aðalstjóri í Fiskimálaráðnum, sigur, at málið um makrelin í ES sjógvi er liðugt avgreitt frá ráðnum, tí kunngerðin er lýst. 

Ráðið væntar sjálvandi, at fyrisitingin, tað er Vørn, heldur seg innan fyri tær heimildir, sum eru, sigur Rógvi Reinert. 

Rógvi Reinert vil tó ikki her og nú taka støðu til, um Fiskimálaráðið heldur, at heimild er at brúka lutakast, tá makrelloyvini í ES sjógvi skulu latast.

Vørn hevur boðað frá, at makrelloyvini verða latin í aðru viku í januar.