Lutakast um makrelloyvi

Bara 14 skip sleppa at fiska makrel í senn, men nógv fleiri vilja hava makrelkvotur. Tí sær Vørn ongan annan útveg enn at kasta lut millum skipini, sum hava søkt.

Tey seks nótaskipini hava tó framíhjárætt, og sleppa tey øll á listan, sum ES skal góðkenna. 

Avgerðin um lutakast um raðfylgjuna hjá skipunum er tikin, tí nógv fleiri umsóknir enn tey átta loyvini, sum kunnu latast afturat loyvunum hjá nótaskipunum eru komnar. 
Og Vørn metir ikki, at serligar treytir lógliga kunnu setast teimum, sum hava søkt, treytir, sum kundu sáldað skip frá.

Skipini fáa loyvi til ein túr í senn í ES sjógvi eftir raðfylgjuni, sum lutakastið gevur. 
Higartil eru umsóknir komnar um 37 skip, men fleiri kunnu leggjast afturat, tí Vørn upplýsir, at freistin at søkja er til á midnátt í annaðkvøld.