Bíða eftir svari úr Mentamálaráðnum

Seinni í vikuni eru sjey mánaðir síðani, Sunda kommuna sendi Mentamálaráðnum umsókn um at skipa teir fimm skúlarnar í kommununi í ein felags skúla við einari leiðslu fyri allar næmingar í kommununi. Og Sunda kommuna bíðar enn eftir svari úr Mentamálaráðnum, skrivar Skúlablaðið.

Á býráðsfundi 16. juni í fjør varð einmælt samtykt at leggja teir fimm skúlarnar í kommununi saman í ein skúla við einari leiðslu. Skúlin verður á Oyrarbakka og skipaður sum skúladepil.

Skúlin skal eita Skúlin við Streymin. Men loyvi krevst frá Mentamálaráðnum til slíka samanlegging. Umsóknin fór hagar 17. juni. Og svar er ikki komið, sigur Jógvan Kruse, fíggjar- og fyrisitingarleiðari hjá Sunda kommunu, við Skúlablaðið.

Sunda kommuna undrast

Av tí at Mentamálaráðið ikki hevur svarað Sunda kommnunu, hevur býráðið avgjørt ikki at brúka pengar til fyrireikingar, eitt nú prosjektering og tekningar og útgrevstur. Tað undrar tey í Sunda kommunu, at svar ikki kemur úr Mentamálaráðnum.

Jógvan Kruse sigur við Skúlablaðið, at Sunda kommuna sendi Mentamálaráðnum umsóknina, áðrenn Mentamálaráðið góðkendi umsóknirnar frá Klaksvíkar kommunu og Tórshavnar kommunu um skúlasamanleggingar.

Klaksvíkar kommuna hevur sett spakan í, og Tórshavnar kommuna hevur longu skipað samanløgdu skúlarnar undir eina leiðslu.