Kjak um veljarakanning og búskap

Veljarakanningin fríggjadagin, sum Fynd gjørdi fyri Sosialin váttar tað, sum aðrar veljarakanningar hava sagt, at samgongan fer at missa meirilutan, tá løgtingsval verður í heyst.

Andstøðuflokkarnir fáa meiriluta, men um teir skipa samgongu, veit eingin, fyrr enn val hevur verið. Tað kann eisini hugsast, at flokkar í verandi samgongu og andstøðu skipa nýggja samgongu. Tó hevur Javnaðarflokkurin sagt, at hann fer ikki í samgongu við Fólkaflokkin, og hugsjónarliga er lítið sannlíkt, at síggja Sambandsflokkin og Tjóðveldi í somu samgongu.

Búskapurin

Og sama dag sum veljarakannigin kom, kom eisini avbjóðingin frá Búskaparráðnum til ta samgongu, ið skal skipast eftir valið.

Búskaparráðið sigur, at tað almenna má útvega sær 750 milliónir krónur aftrat - annaðhvørt sum størri inntøkur ella minni útreiðslur hvørt ár í mong ár.

 Orsøkin til støðuna er lægri inntøkur, hægri útreiðslur og útreiðsluvøkstur, men Búskaparáðið hevur einki boð uppá, hvørji tiltøk skulu setast í verk. Tað er uppgávan hjá politikarunum, verður sagt.

Formaðurin í fíggjarnevndini, Bárður á Steig Nielsen úr Sambandsflokkinum, og Aksel V. Johannesen, fíggjarnevndarlimur og formaður Javnaðarfloksins, fara at skifta orð um hetta í Kjakinum eftir Dag og Viku. Bogi Godtfred er vertur.