Arbeiðstíðin hjá lærarum má endurskoðast

Arbeiðstíðin hjá lærarum má endurskoðast sum skjótast. Tað sigur Lærarafelagið í yvirlýsing, sum er send Mentamálaráðnum. Yvirlýsingin varð skrivað á fundi hjá nevndunum í undirfeløgunum hjá Lærarafelagnum.

Í øllum sjey undirfeløgum er semja um, at arbeiðstíðin, tillutaðu tímarnir, samsvarar ikki við tíðina, sum veruliga verður brúkt til arbeiðið.

Ov fáir tímar

Ov fáir tímar eru tillutaðir til at fremja eitt nøktandi avrik, tí má arbeiðstíðin endurskoðast sum skjótast. 

Til dømis eigur tíðin, sum fer til ferðing, at telja við hjá teimum, sum arbeiða í fleiri skúlum, sigur Lærarafelagið. 

Felagið vísir eisini á, at síðani 2008 hevur eina orðing um førleikaviðbøtur staðið í sáttmálanum millum Lærarafelagið og Fíggjarmálaráðið. 

Førleikaviðbøtur
Enn hevur eingin starvsbólkur fingið førleikaviðbøtur, hóast fólk taka eftirútbúgvingar og átaka sær ábyrgd. 

Í øllum fakbólkum vanta eisini neyvar arbeiðslýsingar. Fólk vita tí ikki, hvat arbeiði teirra fevnir um, sigur Lærarafelagið í yvirlýsingini, sum er send Mentamálaráðnum.