Vit eru nú 540 fleiri

Fólkatalið í Føroyum vaks í fjør. Tann 31.desember 2014 vóru 48.724 fólk í Føroyum, 540 fleiri enn 1.januar.

Orsøkin til vøksturin er millum annað, at fleiri fluttu til Føroya enn úr Føroyum. 1509 fólk fluttu til Føroya í fjør, men 294 færri fluttu úr Føroyum.

Størsti og minsti vøkstur

Størsti fólkavøkstur var í Tórshavnar kommunu, sum fekk 280 nýggjar borgarar í fjør og fór upp um 20.000 fólk. 

Størsta minkingin var í Tvøroyrar kommunu, 21 fólk.

Fólkatalið vaks í níggju oyggjum, minkaði í fimm og stóð í stað í trimum oyggjum.