Trýsttangin verður fluttur á Landssjúkrahúsið

Nógv umrøddi trýsttangin, sum hevur staðið í hølunum hjá Vørn á Hjalla, verður fluttur í nýggj høli á Landssjúkrahúsinum síðst í apríl.

Tað stendur á heimasíðuni hjá Landssjúkrahúsinum. 

Stríð hevur verið um, hvørt tað er Fiskimálaráðið ella Heilsumálaráðið, sum eigur ábyrgdina av tanganum, og skal fíggja hann. Men endaliga avtalan gjørdist, at Heilsumálaráðið skal hava og reka tangan, skrivar in.fo. Sjálv flytingin hevur verið seinkað, men nú boðar Landssjúkrahúsið frá, at tangin verður fluttur síðst í apríl.

Í sambandi við flytingina verður trýsttangin óvirkin frá 20. til27. apríl. Men verða tilburðir av kavarasjúku, meðan tangin er óvirkin, seturLandssjúkrahúsið seg samband við trýsttangatænastuna á Landspítalinum í Reykjavík ella við Royal Infirmery í Aberdeen í Skotlandi, har sjúklingar kunnu fáa viðgerð.