Føðideildin í Suðuroy verður helst stongd

Allar barnakonur í Suðuroy eiga framyvir at føða á Landssjúkrahúsinum í Havn. Tað heldur stjórin í Suðuroyar Sjúkrahúsi, sum í brævi til Karsten Hansen tann 13. apríl í ár mælir til at steingja føðideildini í Suðuroy.

Greinin heldur fram niðanfyri

Orsøkin er, at sjúkrahúsið - vegna ov trongar fíggjarkarmar - manglar ein skurðlækna og ei heldur hevur fakligu serlæknamanningina, ið krevst fyri at "hava eina eftir nútíðarkrevjandi dygdargóða føðideild."

- Út frá aðurnevndu viðurskiftum hevur leiðslan, saman við ljósmøðrunum, eftirmett støðuna, og vilja vit mæla til, at allar føðingar framyvir verða framdar á føðideildini á Landssjúkrahúsinum, skrivar Ronnie Midjord, sjúkrahússtjóri, í brævinum.

Mælir til at varðveita ljósmóðurina

Sjúkrahússtjórin heitir tó á landsstýrismannin um framhaldandi at loyva einari ljósmóður at vera á vakt á Suðuroyar Sjúkrahúsi.

SÍ EISINI Brævið frá sjúkrahúsleiðsluni til Karsten Hansen

Ronnie Midjord mælir eisini landsstýrismanninum til at hugsa um bústaðarviðurskifti, nú barnakonurnar helst mugu til Havnar at verða eina tíð áðrenn ætlaða føðing.

- Talan er ofta um konur, ið eru einsamallar við børnum, tí maðurin er til sjós ella burturi og arbeiðir, og mugu tí atlit takast til, at heimið við eftirverandi børnum virkar sum best, skrivar sjúkrahússtjórin víðari í brævinum.

Karsten Hansen fylgdi ikki tilmæli

Landslæknin mælti í 2013 landsstýrismanninum í heilsumálum til at steingja føðideildina.

Men Karsten Hansen valdi tá ikki at fylgja tilmælinum.Meir um málið í tíðindunum seinnapartin og í Degi og viku í kvøld.

SÍ EISINI Brævið frá 2013, tá Karsten Hansen valdi at lata føðideildina fáa frið