Tyrlur fyri 200 milliónir

Umleið 200 milliónir krónur.

Tað er prísurin fyri tær báðar nýggju tyrlurnar av merkinum AW 139, sum Atlantic Airways í næstum fer at fáa í flotan. 

Tyrlurnar lúka nútímans krøv, og serliga er tað í sambandi við tilbúgving og neyðstøður, at nýggju tyrlurnar koma væl við.

- Hesar tyrlurnar eru sterkari, skjótari og størri enn tær 20 ára gomlu Bell 412. Eitt nú kunnu tær flúgva heilt út á 200 fjóðringar sjómarkið og arbeiða í bjargingarátøkum í 30 minuttir, sigur Jørgen Holme og heldur fram:

- Harafturat er pláss fyri fleiri fólkum, tá sjúkraflutningur  og neyðstøður eru, sigur Jørgen Holme.

Eisini tey vanligu ferðafólkini, sum plaga at brúka tyrlurnar hjá Atlantic Airways, fara at merkja fyrimunir við nýggju tyrlunum.

- Gomlu tyrlurnar kundu taka níggju ferðafólk hvør, meðan pláss eru fyri 15 ferðafólkum í AW139, sigur stjórin í flogfelagnum og vísir eisini á, at ferðafólk í níggju tyrlunum fara at hoyra munandi minni óljóð, tá flogið verður.