Jørgen svara Bill um rúsevnishundar

Tað upplýsir Jørgen Niclasen, landsstýrismaður, í svari til Bill Justinussen, løgtingsmann, sum hevur spurt um ólógligan innflutning av rúsevnum.

At hava rúsevnishund er í høvuðsheitum tað, sum tað kostar at hava hundaførara, sum skal á árligt skeið saman við donskum hundaførarum. Harumframt eru útreiðslur til djóralækna, mat og annað. Metingin er, at alt hetta kostar umleið hálva millión kr.

Eftirlit hvønn dag

Jørgen Niclasen sigur, at tollvaldið er á flogvøllinum til hvørt flogfar, og serligur dentur verður lagdur á at avdúka rúsevni.

Tollvaldið er hvønn dag á posthúsum, og hevur eftirlit við pakkum. Tollvaldið er eisini til reiðar, hvørja ferð Norrøna kemur, og somuleiðis tá onnur skip og bátar koma til Føroya. 

Stór nytta

Jørgen Niclasen sigur, at tað er ikki rætt alment at fara út í æsir at greina, hvussu tollvaldið arbeiðir, tí tað kann skaða sjálvt eftirlitið. Men umframt rúsevnishundin hevur tollvaldið stóra nyttu av røntgum og ferðafólkalistum. 

Tollvaldið hevur gott samstarv við løgregluna og aðrar almennar stovnar, útlendsk tollvald og vinnuna, sigur Jørgen Niclasen í svarinum til Bill Justinussen.