Íverksetarar kunnu søkja lán úr vakstrargrunni

Íverksetarar í Føroyum og Grønlandi kunnu skjótt eisini fáa lán og veðhald fyri lánum úr danska vakstrargrunninum, Vækstfonden.

.Grunnurin veðheldur fyri láni, í mesta lagi tvær milliónir krónur, hjá fyritøkum, sum sjálvar ikki megna at veita nóg stóra trygd. 

Vækstfonden hjálpir fyritøkum, sum hava stóran váða, so stóran, at tey, sum annars læna vinnuni pengar, halda seg aftur.

Vækstfonden hevur ymsar fíggingarloysnir, sum lítlar og miðalstórar fyritøkur kunnu søkja um.

Grunnurin varð stovnaður í 1992 og hevur hjálpt 5400 fyritøkum í Danmark við fígging.

Tekur fólkatingið undir við lógarbroytingini hjá Troels Lund Poulsen, vinnumálaráðharra, fer Vækstfonden at umfata alt ríkið.

Í nøkur ár hevur verið tosað um geva Føroyum og Grønlandi atgongd til Vækstfonden. Leiðslan í grunninum var í Føroyum í mars og kunnaði myndugleikar, fíggingarstovnar og fyritøkur her um grunnin. 

Í mars 2011 lovaði Lars Løkke Rasmussen, sum eisini var forsætisráðharri tá, Kaj Leo Holm Johannesen, løgmanni, at Føroyar sluppu fram at Vækstfonden og øðrum slíkum donskum skipanum.