Samgongan letur ikki við seg koma

Tað er enn ógreitt, um andstøðan fær stuðul úr samgonguni at kalla tingið saman at viðgera frágreiðingina hjá Hans Gammeltoft-Hansen. 

Andstøðan hevur hvørki hoyrt frá samgonguflokkunum ella tingfólkum úr samgonguni, sigur Poul Michelsen, formaður í Framsókn. 

Formenninir í Framsókn, Javnaðarflokkinum og Tjóðveldi hava sent øllum flokkum á tingi og tinglimum bræv, har teir heita á tey um at taka undir við, at tingið verður kallað saman. 

Andstøðan heldur, at málið er ikki ein spurningur um samgongu og andstøðu. Tað er ein spurningur um tingræði, tign og at tingið er evsti politiski myndugleiki, ið umboðar fólkið. 

Sambært niðurstøðuni í frágreiðingin hjá Hans Gammeltoft-Hansen segði løgmaður ósatt fyri tinginum og breyt tískil lógina um ábyrgd landsstýrismanna. 

Hetta er sera álvarsamt, sigur Poul Michelsen. 

- Landsins leiðari kann ikki siga ósatt fyri tinginum, uttan at tingið ger vart við seg, sigur Poul Michelsen.