Óhapp í tunli - trý fólk á Landssjúkrahúsið

Trý fólk vórðu koyrd á Landssjúkrahúsið til kanningar eftir eitt ferðsluóhapp í Kollafjarðartunlinum fyrrapartin.

Fólkini vóru í einum bili, sum á veg suðureftir fyrst rendi á veggin í vinstra borði og síðani á veggin hinumegin.

Tunnilin varð stongdur, meðan fólk frá Ambulansutænastuni, Sløkkiliðinum og politinum arbeiddu á staðnum, har sum óhappið hendi, ikki so langt frá munnanum Kaldbaksmegin. 

Fráboðanin um óhappið kom klokkan 11 minuttir í tíggju, og ein tíma seinni varð aftur koyrandi í Kollafjarðartunlinum. 

Politiið veit ikki enn, hví óhappið hendi. Politiið hevur tosað við fólk, sum sóu óhappið henda. Og politiið skal eisini tosa við fólkini, sum vóru í bilinum.

Bilurin fekk so stóran skaða, at politiið tók pláturnar av honum.