Fáa nýggjan formann seinni í mánaðinum

Sambandsflokkurin fær helst nýggjan formann longu í hesum mánaðinum, men hvør hann verður, skulu valfeløgini gera av.

Landsnevndin hevur fund næsta fríggjadag, har úrslitið av fólkatings- og løgtingsvalinum verður umrøtt. Síðani verður kallað saman til eykalandsfund, har nýggjur formaður skal veljast.

Mikudagin var fundur í tingbólkinum, og har varð avgerð tikin um at kalla landsnevndina til fundar at umrøða støðuna í flokkinum.

Tann fundurin verður næsta fríggjadag.

Tað eru 17 limir í landsnevndini, teirra millum eru umboð fyri tey sjey valfeløgini.

14 dagar ganga

Umframt at umrøða støðuna eftir valini, so skal landsnevndin eisini taka støðu til at kalla saman til eykalandsfund, har nýggi formaðurin skal veljast.

Tað skulu ganga minst 14 dagar frá tí, at lýst verður til eykalandsfund, til fundurin verður. Verður borið skjótt at, kann eykalandsfundurin vera í hesum mánaðinum.

Hvør verður nýggjur formaður, er ikki greitt.

Magni Laksafoss, sum varð valdur aftur á valinum týsdagin, segði í gjár, at hann ikki hevur tikið avgerð um, um hann stillar upp til formansvalið.

Valfeløgini skjóta upp

Tað eru valfeløgini, sum skjóta upp, hvønn tey vilja hava sum formann. Tey noyðast ikki at verða samd, og tí er møguleiki fyri, at tað verður meiri enn eitt formansevni at atkvøða um á eykalandsfundinum.

Bárður Nielsen er næstformaður í Sambandsflokkinum, hann varð valdur á landsfundinum í vár, tá var einki mótvalevni, og hann varð einmælt valdur.

Manningin í tingbólkinum er ikki tann sama, Edmund Joensen og Magni Laksafoss eru aftur partur av tingmanningini, og Magnus Rasmussen er nývaldur. Teir, sum vórðu valdir aftur, eru Kaj Leo Holm Johannesen, Bárður Nielsen og Bjørn Kalsø.