Ov lítil sild í Russlandi

Tí eru russarar farnir at stúra fyri, at ov lítil sild verður at fáa í landinum, skrivar norska FiskeribladetFiskaren.

Blaðið skrivar, at forboðið móti at innflyta uppsjóvarfisk úr Íslandi kemur verri við á russiska marknaðinum enn væntað.

Tí heita myndugleikarnir nú á russisk skip um at landa í Russlandi ella í Føroyum, sum Russland ikki boykottar.

Eru longu farin at landa í Russlandi

Russisk reiðarí eru longu farin at landa í Russlandi, millum annað tí at prísurin har er hægri nú eftir nógvu handilsforðingarnar. Men sum ein reiðari sigur, - torført er at vita, hvat hendir í morgin.

Tað veldst um, hvussu russiski rupilin stendur seg í kapping við stóru gjaldoyruni. Russisku fiskiveiðimyndugleikarnir vænta, at russisk skip megna at fiska tað, sum Russland higartil hevur keypt úr Íslandi.

Til 1. juli í ár, tá Ísland kom á svartalistan hjá Putin, keypti Russland 37.600 tons av fiski úr Íslandi, sum vóru 14,4 prosent av øllum russiska fiskainnflutninginum. Í fjør keypti Russland 125.000 tons úr Íslandi, av teimum vóru 66.200 tons sild.