Bogi Hansen heiðraður fyri at duga væl at miðla

Á Vísindavøkuni í gjárkvøldið varð heiðurslønin fyri at duga framúr væl at miðla gransking latin Boga Hansen, professara í havfrøði. 

Tað er alt annað enn lætt at greiða frá gransking, so øll fata tað, tí evnini mangan eru bæði umfatandi og torskild. Tað skulu tí serligir førleikar til at miðla gransking alment. 

Í grundgevingunum verður sagt, at Miðlaheiðursløn Granskingarráðsins 2015 verður latin Boga Hansen, tí hann á fyrimyndarligan hátt lýkur tey trý krøvini til heiðurslønina, sum eru, at miðlingin er á høgum stigi til ein breiðan skara,  at íkastið økir fatanina av gransking í samfelagnum og, at talan er um fangandi og kjakkveikjandi miðling. 

Bogi Hansen skrivaði í 2000 bókina ”Havið” og í 2011 ”Veðurlagsbroytingar”. Í 2001 fekk Bogi Hansen Virðisløn M.A. Jacobsens fyri yrkisbókmentir fyri bókina ”Havið”.