Allar kvotur eiga at vera eginkvotur

Fiskivinnuráðið minti í gjár Fiskimálaráðið um tað, sum Fiskivinnuráðið segði beint fyri jól í fjør um ætlaðu nýskipanina í fiskivinnuni. Fiskivinnuráðið heldur ikki so nógv um uppboðssølur, soleiðis sum tær verða umrøddar í Føroyum.

Tær hava, sigur Fiskivinnuráðið, eitt einoygt fokus á almennar inntøkur, men einki verður sagt um, hvussu skipanin fer at ávirka vinnuligan bygnað.

Heldur einki verður sagt um møguliga neiliga ávirkan, til dømis bíliga arbeiðsmegi, bílig skip og, at pengar verða tiknir úr vinnuni. Sera umráðandi er, at reiðaríini alla tíðina vita, hvørji loyvi og rættindi, tey hava.

Kann føra til óhepnar støður

Fiskivinnuráðið viðgjørdi á fundinum eina viku fyri jól í fjør kunngerðir, har býtið millum skipabólkar er øðrvísi í 2015 enn tað var í 2014, - tá tað var eitt annað enn í 2013.

Uttan haldgóðar grundgevingar førir hetta til óhepnar støður, har gitt verður um, hvør nú hevur verið sterkastur at trýsta sín vilja ígjøgnum, hvør hevur verið oftast á gátt í Fiskimálaráðnum, ringt til landsstýrismannin og so framvegis.

Vit hava langt eftir á mál, segði Fiskivinnuráðið fyri sløkum ári síðani og endurtók tað í gjár.