Hava brúkt 148 milliónir til advokatar

Til 1. januar i ár brúkti Fíggjarligt støðufesti 148 milliónir krónur til advokatar í stóru sakarmálunum, skrivar tíðindastovan hjá Ritzau.

Í dag byrjar í Eystara landsrætti málið móti stjórn, nevnd og grannskoðara í kollsiglda Roskilde bank, sum eru kravd eftir einari milliard krónum.

Eitt mál er liðugt. Tríggir stjórar í Capinordic Bank vórðu í farna mánað dømdir at rinda 90,5 milliónir krónur. Fíggjarligt støðufesti kravdi 400 milliónir.

Væntar at sakarmálskostnaðurin verður endurgoldin

Eftir eru sakarmálini móti Amagerbanken, Ebh bank, Eik bank Danmark, Eik banki í Føroyum og Løkken sparekasse. Dómurin í málinum móti Roskilde bank kemur væntandi um tvey ár.

Stjórin í Fíggjarligum støðufesti, Henrik Bjerre-Nielsen, væntar, at Fíggjarligt støðufesti fær sakarmálskostnaðin afturgoldnan.

Hann segði við Ritzau herfyri, at sakarmálini móti bankafólkunum hava virði í sjálvum sær, tí tey kunnu fáa tey, sum stýra peningastovnunum, at ansa betur eftir.

Fíggjarligt støðufesti rindaði viðskiftafólki og partaeigarum í Roskilde bank, sum fór á húsagang á sumri 2008, 242 milliónir krónur.