Undantaksstøða lýst í Fraklandi

Undantaksstøða er lýst í Fraklandi, og hetta hevur stóra ávirkan á, hvat fronsku myndugleikarnir kunnu gera av inntrivum móti borgarum og fólki annars í Fraklandi.

Stutt eftir yvirgangsatsóknina boðaði Francouis Hollande, forseti frá, at neyðugt var við undantaksstøðu í landinum Soleiðis segði Hollande, forseti stutt eftir yvirgangsálopini í París fríggjakvøldið.

Men hvat merkir tað fyri fraklendingar og útlendingar í Fraklandi, at undantaksstøða er lýst í landinum? Undantaksstøða er lýst í eini franskari lóg frá 1955, og hon skal brúkast í støðum, tá stórur vandi er fyri almennum vanlukkum.

Soleiðis kann undantaksstøða brúkast

Undantaksstøðan gevur fronsku myndugleikunum serstakan møguleikan fyri at brúka vald móti borgarunum, millum annað rættin at:

● rannsaka bústaðir hjá fólki dag og nátt uttan dómaraúrskurð

● seta fólk í húsavarðhald, um mett verður, at tey eru til vanda fyri trygdina

● seta útigongubann

● avmarka, hvar fólk kunnu fara

● banna størri fólkamongd at savnast

● gera trygdarøki, har fólk kunnu kannast og avhoyrast

● lata almenn støð aftur, so sum skeinkistøð, sjónleikarhús og søvn

● leggja hald á vápn, hóast tey eru lóglig og møguleika at biðja allar borgarar um at lata mynduleikunum skjótivápn

Tjóðartingið kann leingja undantaksstøðuna

Forsetin í Fraklandi hevur rætt at seta landið í undantaksstøðu í 12 dagar, men síðani skal franska tjóðartingið samtykkja, at undantaksstøðan verður longd.

Hetta merkir, at undantaksstøðan, sum forsetin hevur lýst, bara er galdandi til 25. november. Seinast Frakland var í undantaksstøðu var í 2005, tá ófriður og eldsásetingar vóru í forstøðunum í París.

Annars hevur Frakland bara lýst undantaksstøðu í fyrrverandi hjálandinum Algier, í 1955, 1958 og í 1961.

Í 1984 lýsti táverandi franski forsætisráðharrin, Laurent Fabius undantaksstøðu í franska hjálandinum Ný Caledonia, sum royndi at fáa loysing við uppreistri.