Halda hánt um inntøkupolitikkin

Skatta- og avgjalds-øði, sum ikki er sædd í Føroyum fyrr. Soleiðis kallar andstøðan í Fíggjarnevndini, Sambandsflokkurin, Fólkaflokkurin og Miðflokkurin, inntøkupolitikkin hjá samgonguni.

Bárður Nielsen, Jacob Vestergaard og Bill Justinussen hava drúgvar viðmerkingar í álitum, sum Fíggjarnevndin nú kemur við um uppskotini hjá landsstýrinum.

Teir átala harðliga framferðina hjá samgonguni, sum í óðum verkum á mongum økjum fremur grundleggjandi broytingar í føroyska samfelagnum uttan nakra veruliga viðgerð og vantandi lýsing av avleiðingum.

Vænta búskaparliga haldførið versnar

Til dømis hava eingi lógaruppskot verið til hoyringar. Teir tríggir fíggjarnevndarlimirnir minna á, at flokkarnir, sum nú eru í samgonguni, upp í saman tosaðu um fólkaræði, gjøgnumskygni og nærlagni í lógarsmíði, tá teir vóru í andstøðu.

Teir siga, at samgongan krevur 200 mió. kr. frá fólki við øllum sínum avgjaldshækkingum, sum eru komnar í tingið. Harafturat verða kravdar góðar 350 mió. kr. frá vinnuni.

Samstundis vaksa útreiðslurnar 200 mió. kr. næsta ár. Við førda politikkinum versnar búskaparliga haldførið hjá samfelagnum Føroyum, siga andstøðumenninir í Fíggjarnevndini.