- Tíðindi, mentan og ítróttur
Brandur Olsen skiftir felag
Føroyski landsliðsleikarin, Brandur Olsen, skal í komandi ári spæla fyri Vendsyssel í næstbestu donsku fótbóltskappingini.
Brandur Olsen hevur sáttmála við stórfelagið, FC Keypmannahavn, men verður nú leigaður til Vendsyssel.
Ítróttarstjórin í Vendsyssel, Jacob Kruger, fegnast um at hava fingið føroyska miðvallaran í hópin. Hann sigur við heimasíðuna hjá felagnum, at Brandur Olsen fer at styrkja um hópin.
-Hann hevur longu víst í FC Keypmannahavn og á føroyska landsliðnum, at hann kann vera við á allarhægsta stigi, sigur Jacob Kruger.
Brandur Olsen, sum í seinastuni hevur sitið nógv á beinkinum hjá FC Keypmannahavn, sigur við heimasíðuna bold.dk, at hann hevur tikið avgerðina, tí hann vil sleppa at spæla meira.
Brandur Olsen verður fjórði føroyingurin í hópinum hjá Vendsyssel. Frammanundan hevur felagið sáttmálar við Hall Hansson, René Shaki Joensen og Meinhard Olsen.
Vendsyssel er á øðrum plássi í donsku 1.deild, og hevur tí góðan møguleika at tryggja sær uppflyting til Superliguna.
Leigusáttmálin hjá Brandi Olsen við Vendsyssel er galdandi í eitt hálvt ár.