Fleiri ætla at flyta til Føroya

Fleiri kvinnur ætla at búseta seg í Føroyum næstu árini, og samstundis eru færri kvinnur í iva um henda spurning.

Tað vísa eftirmetingartøl hjá Jobmatch.

Sum heild vísa tølini, at áhugin hjá útisetum at flyta til Føroya veksur. 

Fólk verða millum annað spurd, um tey ætla at búgva í Føroyum eitt ár eftir loknan lestur. Í 2011 svaraðu 10 prosent ja, í fjør svaraðu 15 prosent játtandi.

Í sama tíðarskeiði er talið av teimum, sum siga seg ikki vita, um tey ætla at búgva í Føroyum, lækkað úr 30 prosentum niður í 20 prosent.

Kvinnur broyta áskoðan

Tað eru serliga kvinnurnar, sum hava broytt áskoðan. Í 2011 søgdu 12 prosent av kvinnunum, at tær ætlaðu at flyta heimaftur eftir trimum árum. Nú er hetta talið vaksið upp í 25 prosent.

Tølini eru grundað á eftirmetingarskjøl, sum verða savnað inn á hvørjum ári millum tey 300-400, sum vitja á Jobmatch. Umleið helvtin er við í kanningini.

Jobmatch verður aftur týsdagin 29. desember í Norðurlandahúsinum.