Hevði fiskiloyvi í ein dag

Í gjár hevði Asbjørn Senior einki fiskiloyvi sambært heimasíðuni Teyggjuni, har sum øll fiskiloyvi eru skrásett. Asbjørn Senior var, sambært Teyggjuni.fo, í bólkinum onnur skip. Bólkurin hevur felagsmakrelkvotu, sum er 2.844 tons.

Aðalstjórin í Fiskimálaráðnum, Rógvi Reinert, segði við Útvarpið leygardagin, at Fiskimálaráðið hevur nú góðkent fíggingina og ognarviðurskiftini í reiðaríinum hjá Asbjørn Senior, og tí fekk skipið føroyskt fiskiloyvi sambært lógini um vinnuligan fiskiskap.

Hálvan desember í fjør fekk Ocean Group Faroes annars boð frá Fiskimálaráðnum um, at reiðaríið lýkur ikki treytirnar fyri at reka vinnuligan fiskiskap í Føroyum.

SÍ EISINI Fær ein møguleika afturat

Ov nógvur útlendskur kapitalur var í felagnum. Ocean Group Faroes fekk freist til 8.januar at gera viðmerkingar um niðurstøðuna og ætlanarskrivið hjá Fiskimálaráðnum.

Fiskimálaráðið fekk nýtt tilfar frá advokati og grannskoðara hjá felagnum í Vági, og á tí grundarlagnum metti Fiskimálaráðið, at Asbjørn Senior nú lýkur treytirnar í lógini um vinnuligan fiskiskap.

Men sambært Teyggjuni í gjár og eisini nú í morgun hevur Asbjørn Senior einki góðkent fiskiloyvi.