Slept ætlan at umbyggja handil til kommunuhús

Formaðurin í arbeiðsbólkinum, sum gjørdi tilmælið um kommunuhúsið, feldi tað á býráðsfundinum. Ein arbeiðsbólkur gjørdi uppskot um, hvussu bygningurin kundi brúkast

Men uppskotið og tilmælið, sum kallaðist "Til umsiting og sosialar tænastur í FK-bygninginum", fall á býráðsfundinum. Fýra atkvøddu fyri og fimm ímóti.

Ein teirra, sum atkvøddi ímóti, var Dánjal Vang, sum annars var formaður í arbeiðsbólkinum, sum gjørdi tilmælið, ið atkvøtt varð um. Arbeiðsbólkurin avgjørdi at beina málið til býráðið til støðutakan.

Onnur uppskot eru nú komin

Arbeiðsbólkurin mælti til at seta pengar av til at umvæla FK-bygningin til kommunala umsiting, til eina møguliga tannlæknastovu, til mammubólkar og onnur endamál hjá kommununi.

Men formaðurin í arbeiðsbólkinum feldi uppskotið saman við fýra øðrum býráðslimum. Danjal Vang sigur, at sum formaður í arbeiðsbólkinum útvegaði hann tekningar og var við til at gera uppskot um, hvat bygningurin kundi brúkast til.

Síðani bólkurin byrjaði, eru komin onnur uppskot og aðrar ætlanir um, hvussu gamli FK-bygningurin kann brúkast, og eisini eru onnur uppskot komin um, hvar býráðsumsitingin kann vera.

Bað borgarstjóran seta pening av

Meirilutin í býráðnum feldi uppskotið hjá arbeiðsbólkinum, og Dánjal Vang sigur, at hann fer altíð at atkvøða saman við meirilutanum, sum nú er í býráðnum í Fuglafirði.

Dánjal Vang kennir seg ikki bundnan av tí, sum arbeiðsbólkurin gjørdi, hóast hann var formaður í bólkinum.

Dánjal Vang sigur eisini, at hann bað borgarstjóran seta pengar av í fíggjarætlanini hjá Fuglafirði fyri 2016 til FK-bygningin, men tað gjørdi hann ikki.