Fáa svar um hálvatriðju viku

Tað sigur Karen Ellemann, danski almanna- og innanríkisráðharrin, sambært Sirið Stenberg, landsstýriskvinnu, sum hevur svarað fyrispurningi frá Anniku Olsen, løgtingskvinnu.

Danski ráðharrin hevur steðgað allari ættleiðing úr Etiopia. Eisini í Føroyum hava fólk bíðað í nøkur ár eftir at sleppa at ættleiða barn úr Etiopia. Tað hevur kostað teimum nógvar pengar.

1. mai fáa tey at vita, um tey sleppa á bíðilistar hjá teimum, sum vilja ættleiða børn úr øðrum londum.

SÍ EISINI Sirið Stenberg fer at hitta familjurnar

Danska ættleiðingarfelagið sigur, at lagt verður upp fyri, hvussu leingi, fólk hava verið á bíðilista eftir barni úr Etiopia, tá tey verða flutt á annan bíðilista, sigur Sirið Stenberg.

Danish International adoption, DIA, sigur harafturat, at tey, sum vóru á bíðilista til at ættleiða úr Etiopia, fáa 30 prosent av tí, sum tey hava goldið fyri málsviðgerðina, tó í mesta lagi 30.250 kr.

Harafturat fáa tey tilmeldingargjaldið, sum er 5.000 krónur, við sær, tá tey verða flutt á annan bíðilista.