Nógv vilja lesa á Setrinum

173 umsóknir komu inn gjøgum kvotu 2, um at sleppa at lesa á Setrinum. Hetta er nakað meira enn í fjør, tá umleið 150 umsóknir vóru. Ein orsøk er, at fleiri útbúgvingar eru at velja ímillum í ár.  Kvota 2 er har, ið atlit verða tikin til onnur ting, enn bara karakter. 

Í ár var eisini møguligt at søkja inn á nýggju útbúgvingina í búskaparfrøði, og 14 umsóknir komu um at lesa búskaparfrøði.

Flestar umsóknir komu at lesa sjúkrarøkt, har komu 46 umsóknir, 39 hava søkt til lærarar og 37 til námsfrøði. 

Fleiri kvinnur enn menn søktu, 120 kvinnur og 53 menn. Meðalaldurin á teimum, ið søktu gjøgnum kvotu 2 er 30,2 ár.

Freistin at søkja gjøgnum kvotu 2 var upprunaliga  á miðnátt 15 apríl, men freistin varð longd til 20 apríl, tí tekniskir trupulleikar vóru.

Enn ber til at søkja inn á Setrið, tí freistin at søkja eftir kvotu 1 er fyrsta juli.