Óvanliga stórur fólkavøkstur

Fólkavøksturin í Føroyum er í løtuni óvanliga stórur, skrivar Hagstova Føroya á heimasíðuni. 1. apríl í ár búðu 591 fólk fleiri í Føroyum enn 1. apríl 2015.

Vøksturin er 1,2 prosentstig. So stórur fólkavøkstur hevur ikki verið í Føroyum 14 tey seinastu árini, vísa seinastu tølini hjá stovninum.

Serliga fráflytingin er nógv minkað, og tað er grundin til tann stóra fólkavøksturin í Føroyum í løtuni, skrivar Hagstova Føroya á heimasíðuni, hagstova.fo

Færri ung flyta úr Føroyum

Sambært seinastu hagtølunum eru tekin eisini í løtuni um, at aldurssamansetingin í Føroyum so smátt er um at broytast.

Talið av fólki undir 40 ár er aftur farið at vaksa. Færri ung flyta úr Føroyum, og alsamt fleiri flyta til Føroya.

Frá 1. januar 2014 til 1. apríl í ár vaks talið av fólki í aldursbólkinum 0-39 ár við 512 fólkum, skrivar Hagstova Føroya.