Kappingareftirlitið góðkent keypið

Støðan hjá Bakkafrosti broytist ikki munandi á altjóða marknaðinum, hóast Bakkafrost einsamalt fer at eiga Faroe Farming í Vági. Tí hevur Kappingareftirlitið góðkent, at Bakkafrost ætlar at keypa 51 prosent av Faroe Farming.

Talan er um samanlegging, sum bara í avmarkaðan mun ávirkar støðuna hjá Bakkafrosti á heimsmarknaðinum, sigur Kappingareftirlitið í avgerð sínari.

SÍ EISINI Kunnu gera viðmerkingar um keypið

Í avgerðini stendur, at Kappingarráðið hevur tvær ferðir áður tikið støðu til samanleggingar í alivinnuni. Tað var í 2009, tá Bakkafrost og Vestlax Holding løgdu saman, og í 2011, tá Bakkafrost og Havsbrún løgdu saman.

Í báðum førum vórðu samanleggingarnar góðkendar, tí Kappingarráðið brúkti heimsmarknaðin fyri aldan laks sum grundarlag.

Tað sama varð gjørt, nú Bakkafrost og Faroe Farming leggja saman. Støðan hjá Bakkafrosti broytist ikki nevnivert á altjóða marknaðinum, og tí er samanleggingin í lagi, sigur Kappingareftirlitið.