Nú skal Poul hava aðalstjóra

Løgmansskrivstovan lýsir nú aftur eftir aðalstjóra til Uttanríkis- og Vinumálaráðið.

Aðalstjórin er næsti ráðgevi hjá landsstýrismanninum og hevur ábyrgdina av dagligu leiðsluni, menningini og rakstrinum av Uttanríkis- og vinnumálaráðnum. Aðalstjórin er ovasti leiðari fyri ráðið.

Umsóknin skal vera Løgmansskrivstovuni í hendi í seinasta lagi 5. september 2016 kl. 12.00.

Tað er hevur stórt rumbul í miðfyrisitingini og í landstýrinum um hetta starvið, sum hevur verið lýst leyst áður.

Men 3. juni gjørdi løgmaður av, at starvið skuldi lýsast leyst av nýggjum.

10 umsóknir vóru til starvið tá. Tvey fólk vóru innstillað, av teimum var John Rajani innstillaður sum nummar eitt. Men Poul Michelsen, landsstýrismaður, vildi ikki hava John Rajani sum aðalstjóra, millum annað tí, at hann metti hann vera ógegnigan á ali-, tele- og bankaøkinum. Tí gjørdi løgmaður av, at starvið skuldi lýsast leyst av nýggjum.

John Rajani kærdi løgmann og landsstýrismannin til løgtingsins umboðsmann fyri handfaringina av málinum. Umboðsmaðurin segði, at hon hevur ikki heimild at leggja upp í innihaldsligu viðgerðina, tá ein myndugleiki ikki er liðugur at viðgera málið, sum kært er um.
Men John Rajani tók ikki starvsumsókn sína aftur, og hann boðaði tá frá, at hansara umsókn til starvið sum aðalstjóri verður standandi.