Hjúnabandslógin til hoyringar í Føroyum

Í oktober verður kongaliga fyriskipanin um broytingarnar í hjúnabandslógini kunngjørd.

Danska Almanna- og innanríkismálaráðið hevur gjørt onkrar lógartekniskar broytingar í ríkislógartilmælinum, sum kom úr Føroyum. 

Talan er um samkynd, sum eru gift í øðrum londum, og sum flyta til Føroya at búgva, og møguleikan hjá teimum at skiljast.

Kongaliga fyriskipanin, sum hon nú er orðað, verður send til hoyringar hálvan september. Hoyringarfreistin verður fýra vikur.

Danska Almanna- og innanríkismálaráðið hevur spurt Heilsu- og innlendismálaráðið í Føroyum, hvør skal hoyrast í Føroyum.

Løgtingið samtykti í vár at broyta hjúnabandslógina, so samkynd í Føroyum kunnu verða borgaraliga vígd.

Altjóða reglur

Danska Almanna- og innanríkismálaráðið ger vart við, at sambært altjóða privatrættarligum grundreglum skulu hjúnabond og skrásett parløg millum samkynd, sum eru gift í øðrum londum, viðurkennast í Føroyum, tað er um føroyska hjúnabandslógin verður broytt. 

Møguliga fer ikki at bera til hjá teimum, sum eru gift í kirkju í øðrum landi, eitt nú í Grønlandi ella í Danmark, og búgva í Føroyum, at skiljast her.

Men kanska kann rættargangslógin, sum er galdandi í Grønlandi og Danmark, brúkast, tá samkynd fólk, sum eru gift í kirkju har, vilja skiljast. Annars noyðast fólk aftur til landið, har tey blivu gift í kirkju, vilja tey skiljast. 

Signing

Danska stjórnin tekur ikki støðu til, um fólkakirkjan í Føroyum kann nokta at signa samkynd, sum eru borgaraliga gift. Tí fólkakirkjan er yvirtikin. 

Danska Almanna- og innanríkismálaráðið sigur seg bíða, til føroyingar hava broytt hesa reglu. Ráðið vil fegið hjálpa føroyingum at finna røttu orðingina at seta í fyriskipanina um hjúnaband.

Kongaliga fyriskipanin um hjúnaband í Føroyum kemur í gildi, tá Føroyar hava sæð til, at samkynd hjún ikki kunnu krevja signing í fólkakirkjuni.