Norðurlond styrkja útbúgvingarsamstarv

Tey átta Norðurlondini hava skrivað undir avtalu, ið skal gera tað lættari hjá fólki at flyta til og millum ES-londini fyri at arbeiða og lesa

Í framtíðini verður tað lættari hjá fólki í Norðurlondunum at flyta til og millum ES-londini fyri at arbeiða og lesa sambært nýggjari avtalu, ið varð undirskrivað fyrr í vikuni

Bjarni Mohr

06.11.2016 - 12:32

Norðurlond ætla at verða tey fyrstu í Evropa, sum góðkenna øll prógv hjá hvørjum øðrum, staðfestu norðurlendsku undirvísingarmálaráðharrarnir í felags yvirlýsing í Keypmannahavn í vikuni.

Tað merkir, at tað í framtíðini verður lættari hjá fólki í Norðurlondum at flyta millum londini fyri at arbeiða og lesa, og eisini at fáa atgongd til útbúgvingarstøð og størv í ES.

Hinvegin merkir tað eisini, at tað verður lættari hjá útlendingum at taka hægri útbúgvingar í Føroyum, sigur Rigmor Dam, landsstýriskvinna í mentamálum, við Skúlablaðið.

Samstarv byrjaði í 2004

Tey átta Norðurlondini hava síðani 2004 samstarvað á útbúgvingarøkinum um at skipa mannagongdir fyri at góðkenna prógv hjá hvørjum øðrum, sambært blaðnum.

Við nýggju avtaluni er ætlanin, at góðkenningar skulu verða sjálvvirkandi. Tað vil siga, at tá eitt land hevur góðkent eitt prógv, verður tað sjálvvirkandi førleikagevandi í hinum londunum.

Tey átta Norðurlondini eru Føroyar, Danmark, Grønland, Ísland, Noreg, Finnland, Svøríki og Áland.