Viðgera cannabis til sjúkuviðgerð

Nú verður spurningurin um Cannabis til føroyskar sjúklingar viðgjørdur í Løgtinginum. Tað er Jenis av Rana, løgtingsmaður og kommunulækni, sum hevur reist fyrispurningin.

Landsstýriskvinnan í heilsumálum, Sirið Stenberg, verður biðin upplýsa fyri Løgtinginum, um føroyski heilsumyndugleikin hevur ætlanir um at bjóða føroyskum sjúklingum somu royndarskipan við cannabisúrdráttum, sum danska fólkatingið hevur samtykt at bjóða donskum sjúklingum.

1200 sjúklingar í Danmark í royndarskipan

Danska Fólkatingið samtykti í november í fjør, at danskir sjúklingar frá 2018, í eini fýra ára royndarskipan, fara at fáa møguleika at verða viðgjørdir við nattúrligum cannabisúrdráttum.

Talan er um nýtslu til ávísar sjúklingar við ávísum nærri nágreinaðum sjúkueyðkennum, eitt nú sclerosusjúklingar og krabbameinssjúklingar, har cannabis kann linna pínu og aðrar avleiðingar.

Royndarætlanin í Danmark væntast at fara at fevna um einar 1200 sjúklingar.