Grundlógaravhoyring um harðskap

Ein útlendingur sum býr og arbeiðir í Føroyum, skal seinnapartin í grundlógaravhoyring fyri harðskap.

Tað var um fimm tíðina í morgun, at løgreglan fekk boð um, at fleiri mans vóru farnir til hendurs á einum skeinkistað á Skálafjørðinum.

Tveir løgreglubilar fóru á staðið, og gjørdu síðani av at senda tríggjar mans á Klaksvíkar sjúkrahús, tí teir høvdu fingið løstir.

Innlagdur við heilaskjálvta

Ein av monnunum varð innlagdur við heilaskjálvta, meðan hinir báðir sluppu til hús aftur eftir viðgerðina.

Maðurin, sum framdi harðskapin, varð tikin og situr í Klaksvík, meðan hann kemur fyri seg.

Tá hann er nóg væl fyri, skal hann í grundlógaravhoyring um harðskap, upplýsir politiið.

Eisini í Vági fóru tveir mans til hendurs í einum húsum um midnáttarleitið í gjárkvøldið. Politiið varð boðsent, men tá løgreglan kom á staðið, vóru menninir kølnaðir, so meir verður ikki gjørt við ta hendingina.

Í nátt komu fleiri mans eisini til ilnar á einum skeinkistaði í Havn. Tveir løgreglubilar fóru á staðið, og tað gekk skjótt, so kølnaðu menninir aftur. Onkur klæðir vóru skrødd, men annars stóðst eingin skaði av hendingini og einki mál spyrst burturúr hendingini.