Álopið við Landavegin: Tveir menn leyslatnir

Báðir menninir, sum vórðu handtiknir í gjár og til grundlógaravhoyring í dag, eru leyslatnir aftur.

Tað avgjørdi dómarin í grundlógaravhoyringini í dag.

Báðir menninir - ávíkavist 17 og 18 ára gamlir - vórðu handtiknir í gjár og settir í samband við álopið á mannin, sum varð stungin leygarnáttina í Havn.

Referatforboð

Ákærin ynskti í grundlógaravhoyringini, at báðir menninir - eins og hinir báðir menninir í gjár - vórðu varðhaldsfongslaðir í fýra vikur.

Men dómarin avgjørdi at lata menninar leysar.

Hinir báðir eru varðhaldsfongslaðir í fýra vikur - harav fyrsta vikan er í avbyrging.

Meiri fæst ikki at vita frá grundlógarforhoyrinum, tí dómarin avgjørdi at áseta referatforboð - tað vil siga, at miðlarnir sleppa ikki at greiða nærri frá, hvat kom fram í grundlógaravhoyringini.