Mótmæla oljuleiting

Norðurlandahúsið eigur ikki at hýsa fimtu ráðstevnuni um oljuleiting í Føroyum, sum verður um eina viku. Tað siga nakrir felagsskapir og einstaklingar í áheitan á Norðurlandahúsið og Norðurlendska ráðharraráðið.

Á ráðstevnuni í næstu viku byrjar fjórða útbjóðingarumfarið hjá Føroyum, sum Løgtingið einmælt samtykti mánadagin. 

Orsøkin til áheitanina er tann, at olja elvir til veðurlagsbroytingar og upphiting. Fjórða oljuútbjóðingarumfarið er í andsøgn við Paris-sáttmálan. 

SÍ EISINI Leitiloyvi longd

Tað setir lívsgrundarlagið í Føroyum í váða við stuttskygdum løtuvinningi, sum hevur við sær óvissa framtíð við ógvisligum veðurlagi.

Tað siga Ringrás, 350.org, Føroya náttúru- og umhvørvisfelag, Unga Tjóðveldi, Lau Øfjord Blaxekjær, útbúgvingarleiðari á West Nordic Studies á Fróðskaparsetrinum og Jens-Kjeld Jensen í brævi til Norðurlandahúsið og Norðurlendska ráðharraráðið.

Paris-sáttmálin, sum eisini Føroyar hava góðkent, hevur sum mál at fyribyrgja verstu avleiðingarnar av veðurlagsbroytingum við at avmarka alheimsupphitingina.

SÍ EISINI Oljufeløg vilja hava lagaligari treytir

Samstundis hevur Unga Tjóðveldi undir yvirskriftini "Tá grøni flokkurin misti litin" mint Tjóðveldi á samgonguskjalið.

Har stendur, at umhvørvis- og náttúruvernd skulu uppraðfestast, og ferð skal av álvara setast á at leggja orkunýtsluna um, so Føroyar gerast sjálvveitandi við grønari orku.

Fjórða úbjóðingarumfarið hjá Føroyum er eitt tað ógvisligasta brotið á Paris-sáttmálan, sigur Unga Tjóðveldi, sum heitir staðiliga á Tjóðveldi og samgonguna um alt fyri eitt at steðga allar ætlanir um oljuleiting við Føroyar.