Betri bakkar og broytir leiðslubygnað

Betri samtakið tillagar nú leiðslubygnaðin. Tað boðar felagið frá í tíðindaskrivi fyri løtu síðan.

Tryggingareftirlitið góðkennir ikki, at forstjórin í samtakinum eisini er forstjóri í Betri Trygging og Betri Pensjón. Tí verður vent aftur til undanfarna leiðslubygnað í samtakinum.

At Tryggingareftirlitið hevur vrakað nýggja bygnaðin, hevur við sær, at Súni Schwartz Jacobsen ikki heldur fram sum forstjóri í Betri Trygging og Betri Pensjón.

Hann verður framvegis forstjóri í partafelagnum Betri og Betri Banka.

Jean Djurhuus verður verandi stjóri í Betri Trygging, og Helgi L. Petersen verður verandi stjóri í Betri Pensjón.

Nevndarformaðurin Birgir Nielsen hevði annars ongar ætlanir at broyta leiðslubygnaðin, tá sjónvarpið prátaði við hann síðst í apríl.