Her er Føroya dýrasta grannalag

Lítlu húsini á Bringsnagøtu 13 í Havn eru bæði ellifarin og pinkalítil. Fýra veggir og eitt tak eru at kalla tað einasta, sum fylgir við teimum 20 fermetrunum.

Kortini so eru húsini dýr. Tey eru mett til hálva millión; men hægsta boð er í løtuni 650.000 krónur.

Húsaprísurin er rættiliga sigandi fyri húsamarknaðin í høvuðsstaðnum í løtuni, har sethúsaprísurin er vaksin 300.000 krónur í miðal seinasta árið, sambært innanhýsis hagtølum frá Betri Heimi.

Eftirspurningur størri enn útboð

Orsøkirnar til dýru húsini í Havn eru fleiri.

Útboðið er minni enn eftirspurningurin, sum er øktur nógv - eitt nú tí fólk ynskja at flyta heim til Føroya, sigur Jákup Andrias Hansen, húsaseljari hjá Betri Heim.

Fyri tað næsta er fíggingin blivin lættari, tí sethúsarentan er metlág. Tað ger, at fólk kunnu taka dýrari lán.

Reynisbúgvi harmast

Gamli býarparturin í Havn, á Reyni, er kanska dýrasta grannalag í Føroyum. Tað merkir, at tey, ið eiga hús har, eru verd nakrar milliónir.

Men tað er ikki einans gott, heldur John Dalsgarð, sum er nærmasti granni hjá húsunum á Bringsnagøtu 13.

Hann kundi ynskt, at prísirnir vóru meiri vanligir, so húsini á Reyni vórðu keypt av vanligum fólkum - heldur enn av ríkum feløgum, sum brúka húsini til onnur endamál enn at búgva í.