Nú skulu lyfti til landsgrannskoðaran haldast

Í september fer løgtingið at hava aðalorðaskifti um lyftini hjá landsstýrisfólkunum um at avgreiða málini, sum Landsgrannskoðanin ger vart við ár eftir ár.

Løgtingsgrannskoðaranir hava fingið eina frágreiðing frá løgmanni, sum hevur spurt øll landsstýrisfólkini. 

Tey hava svarað, nær og hvussu tey ætla at loysa málini, sum Landsgrannskoðanin og løgtingsgrannskoðararnir gera vart við á hvørjum ári.

Hetta er gjørt eftir áheitan frá løgtinginum.

Løgtingsgrannskoðarar áleggja

Løgtingið samtykti í februar eitt uppskot frá løgtingsgrannskoðarunum, har álagt verður landsstýrinum at seta sær sjálvum tíðarfreistir at fáa øll hesi viðurskifti, sum funnist verður at, orðnað. 

Fíggjarnevndin er eisini samd við løgtingsgrannskoðararnar, tá teir vísa á, at tað er skeivt, at tey, sum umsita almennar pengar, kunnu játta sær sjálvum pengar. Tí eiga hægri myndugleikar altíð at góðkenna samsýningar og aðrar ágóðar.

Fíggjarnevndin heldur, at landsstýrið sum skjótast má gera greitt, at hetta eru treytirnar fyri at umsita almennar pengar.