Fiskidagar skulu framroknast til 1. juli næsta ár

Ein dagur er komin afturat í meldrinum um fiskidagarnar.

Hann eitur 1.juli 2018.

Dagurin er í skrivi frá Skipara- og navigatørfelagnum til Vinnunevndina hjá løgtinginum, sum viðger uppskotið hjá Fiskimálaráðnum um fiskidagar frá 1.september til 31.desember 2017.

Eins og onnur mælir felagið frá kvotum, men mælir til at halda fram við fiskidøgum.

Felagið skjýtur upp at leggja afturat uppskotinum hjá Fiskimálaráðnum, at fiskidagarnir í 2018 skulu framroknast til 1.juli 2018 í sama lutfalli, sum teir eru frá 1.september til 31.desember í ár. 

Nýggjur útrokningarháttur

Frá 1.juli 2018 skal ein nýggjur útrokningarháttur brúkast, mælir Skipara- og navigatørfelagið til.

Ásetast skal eitt tonsatal fyri hvørt fiskaslag. 

Skipara- og navigatørfelagið nevnir tosk sum dømi. Tonsatalið er 10.000. 

Um meira enn 10.000 tons av toski eru fiskað, tá fiskiárið er liðugt, verða fiskidagar lagdir afturat samsvarandi tí, sum er fiskað meira enn 10.000 tons.

Er fiskað minni enn 10.000 tons, verða færri fiskidagar.