Ikki søkt eftir nýggjum stjóra enn

Johnny í Grótinum fer úr stjórasessinum á Landssjúkrahúsinum 1. september, men enn er eingin nýggjur stjóri settur.

Hóast tríggir mánaðir eru lidnir, síðani Johnny í Grótinum segði stjórastarvið á Landssjúkrahúsinum frá sær, hevur Heilsumálaráðið ikki søkt eftir nýggjum stjóra enn. Tí kunnu ganga fleiri mánaðir, áðrenn landssjúrkahúsið fær nýggja leiðslu.

Heilsumálaráðið arbeiðir í løtuni við eini heilsunýskipan, har millum annað leiðslurnar á Suðuroyar Sjúkrahúsi, Klaksvíkar Sjúkrahúsi og Landssjúkrahúsinum verða lagdar saman í eina felags leiðslu. 

Tað ljóðaði at Johnny í Grótinum skuldi vera ovasti leiðari í nýggju sjúkrahúsleiðsluni, og saman við lokalbundnum leiðslum mynda leiðsluna í sjúkrahúsverkinum og tí er spurningurin um Heilsumálaráðið skal søkja eftir einum ella tveimum stjórum. 

Ein leiðar skal verða settur fyri alt sjúkrahúsverkið í seinasta lagi 1. januar 2018.

Tað er ikki eydnast at fáa orðið á landsstýriskvinnuna í Heilsumálum í dag, men sambært aðalstjórinaum Turið Arge kemur heilsumálaráðið við eini fráboðan í vikuni.