Spyr um Selatraðarvegin

Annita á Fríðriksmørk í Tjóðveldi vil hava at vita frá Henriki Old, landsstýrismanni, nær ætlanin er at gera Selatraðarvegin lidnan, og hvussu nógv arbeiðið fer at kosta.

Á langtíðar fíggjarkarminum fyri 2018 er landsstýrissamgongan samd um, at peningur skal setast av at gera Selatraðarvegin lidnan.

Landsverk hevur fyrr mælt til at játta millum tvær og fimm milliónir kr. um árið at breiðka og dagføra vegin.

Annita á Fríðriksmørk sigur, at undirtøka hevur ikki verið fyri at gera vegin lidnan, men nú sær út til, at politiskur vilji er at fremja ætlanina.

Hon spyr eisini Henrik Old, hvussu langa tíð, hann metir, at arbeiðið fer at taka, og hvaðani ætlanin er at fáa grótið til at breiðka Selatraðarvegin.