Kenja sett bann fyri at brúka plastikposar

Nýggja forboðið í Kenja snýr seg um at brúka, framleiða og innflyta plastposar. 

Um tú ferðast til Kenja skalt tú sostatt leggja allar plastposar eftir á flogvøllinum, skrivar BBC. Forboðið fevnir ikki um tey, sum framleiða plastposar til ídnaðin. 

Forboðið verður sett í verk, tí stjórnin í Kenja heldur, at plastposar skaða umhvørvið og tí teir tippa frárensl. Hvørt ár lata matvøruhandlar í Kenja út 100-miljónir plastposar, sambært upplýsingum í ST-umhvørvistilmælinum.

Arbeiðsfremjandi

Men forboðið fær ikki bara góða móttøku í landinum. Kenjiskir framleiðarar halda, at forboðið fer at gera fólk arbeiðsleys. 

Men kenjiski umhvørvismálaráðharrin, Judi Wakhungu, sigur tvørturímóti, at forboðið fer at skapa fleiri arbeiðspláss, tí nú er neyðugt at framleiða fleiri posar burturúr umhvørvisvinarligum tilfari.

Sambært ST-umhvørvistilmælinum, eru stórir umhvørvisligir trupulleikar av plastposum, tí teir skaða umhvørvið og elva til ringa heilsu. Plastposar eru partur av teimum átta miljónum tonsunum av plasti, sum hvørt ár verða tveitt í havið. Og heldur henda gongdin fram, so verður meira plast enn fiskur í havinum í ár 2050.

Ikki fyrstu ferð

Hetta er ikki fyrstu ferð, at plastposar verða bannaðir í Kenja. Í 2005, 2007 og 2011 vórðu tunnir posar bannaðir, tí teir lættiliga fóru við vindinum. Men forboðið hevur ikki bøtt nakað serligt um støðuna, og nú verða reglurnar so herdar.

Forboð, sum hetta í Kenja, eru sett í verk í øðrum afrikonskum londum, - eitt nú Kamerun, Guinea-Bissau, Mali, Tansania, Uganda, Etiopia, Mauretania og Malawi, skrivar svt.