Bretskur varaforsætisráðharri koyrdur

Bretski varaforsætisráðharrin, Damian Green, hevur lagt frá sær eftir áheitan frá Theresu May, forsætisráðharra, tí hann hevur sagt ósatt í einum máli um pornografiskar myndir, sum vórðu funnar á arbeiðsteldu hansara í 2008.

Damian Green hevur higartil noktað fyri at hava tikið myndirnar niður á telduna.

Men í einum brævi til Theresu May, sum eisini er kunngjørt á heimasíðuni hjá bretsku stjórnini, viðgongur frákoyrdi varaforsetin, at hann átti at verið greiðari í útsagnum sínum til fjølmiðlarnar í 2008, og at løgreglan síðani reisti málið í 2013.

Damian Green er eisini lagdur undir at hava sýnt óhóskandi atburð móti eini tíðindakvinnu, og tað harmast hann um í brævinum til forsætisráðharran.

Í kjalarvørrinum av hesum báðum málunum hevur Theresa May, forsætisráðharri, síðani heitt á Damian Green um at leggja frá sær sum varaforsætisráðharri.