Handlar í Føroyum loyvi at vraka danskar seðlar

Handlar í Føroyum hava fullan rætt til at nokta at taka danskar pengaseðlar.

Tí danskir seðlar eru ikki lógligir at gjalda við í Føroyum.

Tað sigur Brian Mikkelsen, vinnumálaráðharri, í svari til Sjúrð Skaale, fólkatingsmann, sum spurdi, hví tað ikki ber til at brúka føroyskar pengaseðlar í Danmark. 

Líka lítið sum føroyskir seðlar eru lógligur gjaldmiðil í Danmark, eru danskir seðlar lógligur gjaldmiðil í Føroyum, sigur Brian Mikkelsen.

Sjálvboðið

Men hann leggur afturat, at handlar og onnur kunnu sjálvboðin taka danskar seðlar í Føroyum og føroyskar seðlar í Danmark. 

Brian Mikkelsen sigur, at peningastovnar í Danmark hava ikki skyldu til at veksla føroyskar seðlar til danskar.

Men teir kunnu tó gera tað, og taka sær samsýning afturfyri.

Tjóðbankin kann veksla uttan samsýning.

Eingin broyting

Ráðharrin sigur, at tað fer at kosta vinnurekandi og brúkarum, um føroyskir seðlar við lóg skulu gerast lógligur gjaldmiðil í Danmark. 

Hann hevur tí onga ætlan um slíka lógarbroyting, sum áleggur handlum í Danmark at taka føroyskar seðlar. 

Brian Mikkelsen vísir føroyingum, sum ferðast í Danmark, á møguleikan at brúka gjaldskort.

Hann sigur, at bara ein fjórðingur av tí, sum verður keypt í handlum í Danmark, verður goldin við reiðum peningi.