Taka undir við Hvalbiartunnli

Fíggjarnevndin mælir til, at 272 milliónir krónir verða játtaðar til nýggjan Hvalbiartunnil árini 2016 til 2022.

Fíggjarnevndin hevur skrivað álit í málinum um at gera nýggjan Hvalbiartunnil, sum Henrik Old, landsstýrismaður, hevur lagt fyri tingið.

Meirlutin í fíggjarnevndini, tað eru umboðini hjá samgonguni, sigur, at nýggi tunnilin er ein tiltrongd dagføring av farleiðini millum Hvalba og Trongisvág, farleiðin verður styttri, tryggari og í mun til verandi leið minni ávirkað av veðri. Eisini er verkætlanin framtíðartryggjað, soleiðis at hædd er tikin fyri eini framtíðar Suðuroyarleið.

Minnilutin, tað eru umboðini hjá andstøðuni, halda, at Fámjinstunnilin eigur at verða boðin út samstundis. Hetta fer at gera, at Fámjinstunnilin fer at verða bæði bíligari og skjótari bygdur, enn ætlanir landsstýrisins eru við einum boritoymi.

Eitt annað uppskot liggur eisini í tinginum, sum hevur við Hvabliartunnilin at gera.

Tað er eitt uppskot til samtyktar, sum tveir samgongutinglimir, Heðin Mortensen og Kristin Michelsen, hava lagt fram saman við andstøðutingmonnunum Jenis av Rana, Kaj Leo Holm Johannesen, Jacob Vestergaard. Sambært tí uppskotinum, so skal tunnilin til Fámjins gera, bjóðast út samstundis, sum arbeiðið at gera Hvalbiartunnilin  verður boðið út. Men tað uppskotið liggur framvegis í rættarnevndini.