Ongin eykajáttan til LS enn

Enn er ógreitt, um Landssjúkrahúsið fer at fáa 10 milliónir krónir í eykajáttan.

Fíggjarnevndin tók onga støðu á fundinum í dag um málið. Fundurin varð tí niðurlagdur, og verður tikin uppaftur mánadagin.

Biðið er um eina eykajáttan á 10 milliónir krónur. Landsjúkrahúsið hevur tørv á 21 milliónum krónum, fyri at fáa játtanina í ár at hanga saman. Men nakað av peninginum er funnið við sparingum.

Málið hevur skund, tí Landssjúkrahúsið fyri at halda játtan, má seta fleiri tiltøk í verk, enn ráðiligt er, stendur í fíggjarnevndarskjalinum.

Men ongin avgerð varð tikin í dag, tí onkrir nevndarlimir vildu tosa við baklandi, áðrenn teir tóku støðu.

Meira er at frætta í tíðindum klokkan 16.