Tyrlurnar brúka ikki ov nógva tíð til útlendingar

Seinastu trý árini og higartil i ár hava tyrlurnar hjá Atlantic Airways brúkt slakar 46 tímar til at bjarga útlendingum, sum eru fluttir av skipi á sjúkrahús í Føroyum ella hava verið fastir í fjøllunum ella hava fingið skaða har.

Høgni Hoydal, landstýrismaður, hevur svarað Kára P. Højgaard, løgtingsmanni, sum spurdi, hvussu ofta føroyska tyrlan hevur bjargað útlendskum ferðafólkum seinastu trý árini. 

Høgni Hoydal sigur, at skilt verður millum SAR hendingar, sum eru leiting og bjarging, og MEDEVAC hendingar, sum er at flyta løstað fólk á sjúkrahús. 

Frá 2015 til í ár higartil hava verið 13 MEDEVAC hendingar og 15 SAR hendingar. 

50 tímar eru settir av hjá Tyrlutænastuni um árið til at hjálpa útlendingum.

Einki endurgjald verður kravt fyri slíka leting og bjarging, sigur Høgni Hoydal.