Ongin rakstrarjáttan fylgir við Hoydølum

Tað sæst í fundarfrágreiðingum, sum Kringvarpið hevur fingið innlit í.

Í fundarfrásøgn frá fundi millum Mentamálaráðið og LISA 22. mars í ár, sæst í fundarfrásøgnini, at Rigmor Dam, landsstýriskvinna, tá upplýsti fyri LISA, at ongin rakstrarjáttan fylgir við.

Umboðini hjá LISA løgdu á fundinum dent á, at listafólk eru von at rinda leigu fyri arbeiðshølir.

Viðvíkjandi hølunum helt landsstýriskvinnan, at talan mátti vera um eina skipan, har listafólk skiftast um at hava høvi at brúka hølini, so hølini ikki bert gagna nøkrum fáum, sæst í fundarfrágreiðingini frá fundinum 22. mars.

Á fundi við Tjóðsavnið 21. juni, segði landsstýriskvinnan, at eingin eyka rakstrarjáttan kann fylgja við til tey, sum skulu brúka Hoydalar.

Nakrar fortreytir eru, sum mugu fáast í lag, áðrenn Tjóðsavnið kann flyta inn, stendur í fundarfrásøgnini. Nýggj lásaskipan má gerast, sum kostar nakrar hundrað túsund krónur, og kannast má, um læknahúsini skulu seljast.

Nýtslan skal gerast upp. LISA kundi goldið eitt nú ein triðing. Roknast kann við umleið 700.000 til eina millión krónur til hita og annað, sæst í fundarfrágreiðingini.

Herleif Hammer, stjóri á Tjóðsavninum, gjørdi á fundinum vart við, at avtalan ikki mátti leggja útreiðslur á Tjóðsavnið, í minsta lagi mátti status quo varðveitast, sæst í fundarfrágreiðingini, sum Kringvarpið hevur fingið innlit í.