Nøgdin av ruski í heiminum veksur

Tað stendur í nýggjari frágreiðing frá Heimsbankanum, sum ávarar ímóti gongdini.

Orsøkin er, at fólkatalið í heiminum veksur. Størstu nøgdirnar eru í ídnaðarlondunum, hóast bert 16 prosent av fólkinum búgva í teimum londunum, stendur í frágreiðingini.

Men tað er serliga gongdin í menningarlondunum, sum fer at økja nógv um ruskið, sigur heimsbankin.

Eftir kanningini fer nøgdin av ruski í suðurasia at tvífaldast til 2050 og í Afrika fer nøgdin at trífaldast.
Verður einki gjørt, so fer tað at vera eitt afturstig fyri allan heimin, sigur menningarstjórin í heimsbankanum, Silpa Kaza.
Hann vísir á, at nógva kann sparast, um londini gera meir fyri at savna ruskið saman og endurvinna ein stóran part av ruskinum.
Sum er, verður 90 prosent av ruskinum tveitt á opin ruskpláss, uttan at meir verður gjørt við tað. Og tað er serliga galdandi í fátæku londunum.
Í býunum har trupulleikin við ruskin er størst, er væntandi játtan til ruskinnsavning størsti trupulleikin, vísir heimsbankin á.
Tí letur tað seg væl gera, at privatar fyritøkur taka um endan, og fáa gongd á endurnýtslu av nógva ruskinum, eru ráðini frá heimsbankanum.