Seta í skiftirættinum

Tað varð upplýst í Skiftirættinum í dag. at Realurin hevur gjørt fleiri enn eina roynd at selja garnaskipið Anitu bæði í Føroyum og uttanlands tó uttan úrslit. 

Anita er einasta ogn hjá P/f Seta, sum er sent Skiftirættinum til tvingilsavtøku. Men krøvini móti felagnum eru nógv størri enn virðið á Anitu. 

Realurin er fyrsti og størsti veðrættarhavi í skipinum hjá partafelagnum. Kravið hjá Realinum er okkurt um 13 milliónir krónur. 

Annan veðrætt hevur spanski eigarin í Anitu. Tann veðrætturin er fýra milliónir krónur.

Ikki ber til at selja Anitu á tvingsilsuppboði í Føroyum, tí skipið liggur í Spania.

Men endin verður helst tann, at Anita verður seld á tvingsilsupppboði, upplýsti bústjórin, Óla Jákup Kristoffersen, í Skiftirættinum.

Skipið hevur ikki verið til fiskiskap síðani á vári 2014, tá tað fyrst misti ein mann og síðani varð tikið fyri at hava ov nógv gørn.

Skrásetingin sendi Skiftirættinum partafelagið Seta til tvingsilsavtøku í juni.

Orsøkin var, at felagið hevur bara ein nevndarlim. Teir skulu vera minst tríggir.

Felagið varð eisini sent Skiftirættinum til tvingsilsavtøku í fjør, tí tað hevði ikki latið roknskap fyri 2016. Men hann kom tó seinni.

Partafelagið varð tá tikið úr Skiftirættinum aftur.

Felagið helt fram við nýggjari nevnd og broyttum viðtøkum. 

Í nýggju nevndini vóru Jónas Sigmarsson í Havn, hann var eisini stjóri í felagnum, Anton Sigmarsson í Hoyvík og Angel Pego Vidal í Spania, sum er nevndarformaður.

Angel Pego Vidal var eisini í felagnum, áðrenn tað varð umskipað.